အေစီမီလန်ပွဲမှာ အစောပိုင်း ဂိုးပေးခဲ့ရတဲ့ လီဗာပူးအသင်းဟာ ဘုန်းမောက်ကို ရင်ဆိုင်ရတဲ့ ပရီးမီးယားလိဂ်ပွဲမှာလည်း ခပ်စောစော ဂိုးပေးခံရတာဟာ သတိပြုစရာ အချက်ဖြစ်ပါတယ်။
အာနယ် ဆလော့ရဲ့ လီဗာပူးဟာ ပွဲတန်ပို တင်နိုင်ဖို့ အရှိန်လိုအပ်တာမျိုး ဖြစ်နိုင်ပြီး ဒီတစ်ကြိမ်မှာတော့ ဘုန်းမောက်ဘက်က လူကျွံနေတာကြောင့် ကံကောင်းခဲ့ပါတယ်။
အယ်လီဆန် မပါချိန် ကလယ်ဟာ ပွဲထွက်လာပြီး တိုက်စစ်က ဒါဝင်၊ ဒီယက်ဇ်တို့ကို ပြန်ထည့်ထားကာ ဘယ်အစွန်မှာလည်း ရော်ဘတ်ဆန်ကို ပြန်သုံးတာကြောင့် အသင်းဟာ ပွဲပန်းလို့ အထနှေးတာလို့ ပြောလို့တော့ မရပါဘူး။
အဖွင့်ဂိုးဟာ ကိုနတေး ပေးလာတဲ့ အမြင့်ဘောကို ဒီယက်ဇ်က ပါးနပ်စွာ ဖောက်ထွက်ပြီး ဂိုးသမားကိုပါ လှည့်ပြီး သွင်းယူခဲ့တာ ဖြစ်ပါတယ်။ မိနစ်ပိုင်း အကြာမှာပဲ ညာအစွန်ကနေ ပြိုင်ဘက် ဧရိယာထိပ် အတွင်းထဲထိ ဝင်ရောက်လာတဲ့ ထရန့်ရဲ့ ပေးချက်ကနေ ဒီယက်ဇ်က ထပ်မံ ပိတ်သွင်းပါတယ်။
အနိုင်အားကောင်းစေတဲ့ သွင်းဂိုးကတော့ ကိုနတေးရဲ့ အမြင့်ဘောကိုပဲ ဒါဝင်က ဆာလာနဲ့ တွဲဘက်ကာ ဧရိယာထိပ်ထိ ယူသွားခဲ့ရင်း ညာခြမ်းကနေ ဂိုးသမားထောင့်ကို ပိတ်သွင်းခဲ့တာ ဖြစ်ပါတယ်။
ပထမပိုင်း ခြေစွမ်းက ပြီးပြည့်စုံခဲ့ပေမယ့် ဒုတိယပိုင်းမှာ လီဗာပူးရဲ့ ကစားအားက ကျဆင်းလာပါတယ်။ ဒါကြောင့်ပဲ ဆိုဘိုစလိုင်နေရာ ကာတစ်ဂျုံးကို ထည့်ခဲ့ကာ ဒီယက်ဇ်နဲ့ ဒါဝင်နေရာမှာ ဂက်ပိုနဲ့ ခီယေဆာတို့ကို ထည့်ပြီး ကစားအားကို ပြန်ထိန်းခဲ့ပါတယ်။
ဂျုံးနဲ့ ခီယေဆာတို့ ကစားနိုင်စွမ်း မဆိုးလှပါဘူး။ ဒါပေမယ့် ပွဲတွေ ဝေးနေကြတာကြောင့် လူစားဝင်လာပြီး ကြံ့ခိုင်မှုတွေ ပိုမို တိုးတက်လာအောင် လုပ်ရပါဦးမယ်။ နှစ်ဦးလုံးထံက အကောင်းမြင်စရာ ခြေစွမ်းမျိုးတွေ မြင်ခဲ့ရပါတယ်။
ပထမပိုင်းနဲ့ ကွဲပြားတာက လီဗာပူးအသင်းဟာ ဒုတိယပိုင်းမှာ ဘုန်းမောက်ကို ဘောလုံးကစားခွင့် အတော်လေး ပေးရတာဖြစ်ပါတယ်။ ဘုန်းမောက်ကလည်း ကျစ်လစ်တဲ့ အသင်းကောင်းဖြစ်ပြီး လီဗာပူးခံစစ်ကို ထိုးဖောက်ဖို့ အကြိမ်ကြိမ် ကြိုးစားခဲ့ကာ ထောင့်ကန်ဘောတွေ အတော်လေး ကန်ခွင့်ရခဲ့ပါတယ်။
လီဗာပူးအသင်းဟာ တောင်ပံနဲ့ အစွန်တွေကို အရမ်း အားမပြုတော့ဘဲ ကွင်းလယ်နဲ့ အလယ်ကြောကိုပဲ အဓိက အားပြုတာကြောင့် ထောင့်ကန်ဘော ရနှုန်း တဟုန်ထိုး ကျဆင်းနေတာကိုလည်း သတိပြုမိပါတယ်။
ကိုယ့်ဖက်ကရတဲ့ အခွင့်အရေးတွေကို အသုံးမချနိုင်ပေမယ့် ပြိုင်ဘက်ကို ဂိုးမပေးရအောင် ခံစစ်က လုံလောက်စွာ ဟန့်တားနိုင်ခြင်းနဲ့အတူ အသင်းဟာ ၃-၀ ဆိုတဲ့ ရလဒ်နဲ့ပဲ ပွဲပြီးခဲ့ပြီး ဒီအပတ် မန်စီးတီး vs အာဆင်နယ်ပွဲ မတိုင်ခင် ဇယားထိပ်ကို တက်သွားခဲ့ပြီ ဖြစ်ပါတယ်။