လီဗာပူးအသင်းဟာ ချယ်ဆီးခံစစ်မှူး လီဗီ ကိုးဝယ်ကို သဘောကျနေတာ သေချာပေမယ့် အပြောင်းအရွှေ့ ဖြစ်မြောက်ဖို့ရာ အခြေအနေက ရှုပ်ထွေးလှတယ်လို့ သတင်းထောက် ရိုမန်နိုက ပြောလာပါတယ်။
ဒီနွေမှာ ခံစစ်မှူးသစ် ခေါ်ယူဖို့ ပြင်ဆင်ထားတဲ့ လီဗာပူးအသင်းဟာ ကိုးဝယ်ကို ဦးစားပေး အဖြစ် ရွေးချယ်ထားတာပါ။ အင်္ဂလန်ကြယ်ပွင့်က လီဗာပူးအသင်း လိုအပ်နေတဲ့ homegrown နေရာအတွက်ပါ အင်အားဖြည့်ပေးနိုင်ပါလိမ့်မယ်။
ရိုမန်နိုကတော့ ” လီဗာပူးအသင်းက လီဗီ ကိုးဝယ်ကို စိတ်ဝင်စားနေတာ ၁၀၀% အတည်ပြုလို့ရပါတယ်။ ဒီစိတ်ဝင်စားမှုက သိပ်ကို အားကောင်းပါတယ်။ ဒါပေမယ့်လို့ ချယ်ဆီးကလည်း သူက အရေးကြီးတဲ့ ကစားသမားလို့ မြင်နေတာနဲ့အတူ အခြေအနေက ရှုပ်ထွေးပါတယ်။
ခံစစ်မှူး ထွက်ခွာဖို့ဆိုရင် သူကိုယ်တိုင်က ချယ်ဆီးအသင်းဘက်ကို အသင်းပြောင်းလိုပါကြောင်း တိုက်ရိုက် တောင်းဆိုမှပဲ ဖြစ်နိုင်ပါလိမ့်မယ် ” လို့ ဖော်ပြသွားပါတယ်။
ကိုးဝယ်ဟာ မနှစ်တုန်းက ဘရိုက်တန်ကို အငှားထွက်ကစားရာက ထင်ပေါ်လာခဲ့သူ ဖြစ်ပါတယ်။ အသက် ၂၀ အရွယ် ခံစစ်မှူးကို ဘရိုက်တန်က ပေါင် ၃၅ သန်း ဖြင့် ကမ်းလှမ်းပေမယ့် ချယ်ဆီးဘက်က ပယ်ချထားခဲ့တယ်။ သူဟာ ယူရိုဖလား အနိုင်ရ အင်္ဂလန် ယူ-၂၁ အသင်းမှာ ဂျုံးတို့နဲ့အတူ ခြေစွမ်းပြခဲ့ပါတယ်။
မကြာခင် ကစားသမားနဲ့ ဆွေးနွေးမှု လုပ်မယ့် ချယ်ဆီးနည်းပြ ပိုချက်တီနိုကတော့ “ ကိုးဝယ်ဘက်က ဘယ်လို ခံစားမိနေလဲ သိဖို့ လိုပါတယ်။ သူ့အတွေးထဲမှာ ဘာတွေရှိနေလဲ ကျနော် သိရဖို့ လိုပါတယ်။ သူဘာကို မျှော်လင့်ထားလဲပေါ့။ နောက်ပြီး သူနဲ့ ပတ်သက်လို့ ကျနော်ဘက်က အမြင်တွေလည်း ပြောဆိုမှာပါ ” လို့ ထုတ်ပြောခဲ့ပါတယ်။