ဂျော်ဒန် ဟန်ဒါဆန် ထွက်ခွင့်တောင်းတဲ့ ကိစ္စဟာ သူ့ကို အံ့အားသင့်စေခဲ့ကြောင်းနဲ့ အပျက်အပျက်နဲ့ နှာခေါင်းသွေး မထွက်လိုတာကြောင့် ထွက်ခွင့်ပေးခဲ့တယ်လို့ နည်းပြကလော့ပ်က ထုတ်ပြောခဲ့ပါတယ်။
အသက် ၃၃ နှစ်အရွယ် ကွင်းလယ်လူဟာ တစ်ပတ်လုပ်ခ ပေါင် ၇၀၀၀၀၀ ရမယ့် ဆော်ဒီကလပ် Al Ettifaq အသင်းထံ ၃ နှစ်စာချုပ်ဖြင့် ပြောင်းသွားခဲ့တာပါ။ ဒီအပြောင်းအရွှေ့မှာ လီဗာပူးက ပေါင် ၁၂ သန်း ပြောင်းရွှေ့ကြေးရခဲ့တာ ဖြစ်ပါတယ်။ သူ့သဘောကတော့ ဟန်ဒါဆန်ကို ဆက်ထိန်းဖို့ပါလို့ ကလော့ပ်က ဝန်ခံခဲ့တယ်။
‘ ဟန်ဒါဆန် ထွက်ခွင့်တောင်းချိန် ကျနော် အံ့ဩခဲ့လား? ဆိုရင် အံ့ဩတယ်လို့ ဖြေရပါလိမ့်မယ်။ ကျနော်တို့က ၈ နှစ်ကြာ လက်တွဲလာတာပါ။ ကျနော်တို့ သူ့ကို ဆက်ထိန်းချင်တာ သူသိပါတယ်။ ဒါပေမယ့် သူက ထွက်ချင်နေတော့ အပျက်အပျက် နှာခေါင်းသွေးထွက်မယ့် ကိစ္စတွေ မဖြစ်လိုတော့ပါဘူး။ ကျနော်တို့ တားမနေတော့ပါဘူး။
ဂျော်ဒန်က ကျနော်တို့ကို သတိရနေမှာပါ၊ ကျနော်တို့လည်း သူ့ကို သတိရမှာပါ။ ဒါပေမယ့် ကျနော်တို့ ဆက်သွားရမယ်၊ ဆက်သွားပါမယ်။ ဒါပါပဲ ’ လို့ ကလော့ပ်က ရှင်းပြခဲ့ပါတယ်။
အခုဆိုရင် မနှစ်ကနွေမှာ တောင့်တင်းလွန်းလို့ အားဖြည့်စရာ မလိုပါကြောင်း နည်းပြကလော့ပ် ပြောခဲ့တဲ့ ကွင်းလယ်နေရာဟာ သီယာဂို တစ်ဦးပဲ စီနီယာ ကစားသမားအဖြစ် ကျန်ရစ်ခဲ့ပြီး ဟန်ဒါဆန်၊ မီလ်နာ၊ ချိန်ဘာလိန်၊ ကိတ်တာ၊ ဖာဘင်ညို၊ အာသာတို့ ထွက်ခွာသွားမှာ ဖြစ်ပါတယ်။
လက်စတာပွဲကြို စင်္ကာပူမှာလုပ်တဲ့ မီဒီယာတွေ့ဆုံမှုမှာ ကလော့ပ်ကပဲ ” ကွင်းလယ်ကို ပြန်အားဖြည့်ဖို့က သေချာပေါက် အရေးကြီးပါတယ်။ ကျနော်တို့ တစ်ခုခုလုပ်ရမယ် ဆိုတာ ရှင်းပါတယ်။
ဖြေရှင်းဖို့အတွက် ကျနော်တို့ ကြိုးစားနေတယ်။ ပထမတော့ လူတွေက အပြောင်းအလဲကို လိုချင်ကြတယ်။ အခုတော့ အပြောင်းအလဲတွေကြောင့်ပဲ လူတိုင်းက စိတ်ပူလာနေပြန်ပါတယ်။ ကျနော်တို့ကတော့ ဒီအခြေအနေကို အကောင်းမြင်ပါတယ်။ အရမ်းလည်း စိတ်လှုပ်ရှားပါတယ် ’ လို့ ဖြေဆိုသွားတာ ဖြစ်ပါတယ်။
လီဗာပူးဟာ ဖာဘင်ညိုနဲ့ ဟန်ဒါဆန် နေရာကို ဆောက်သမ်တန် ကွင်းလယ်လူ လာဗီယာဖြင့် ပြန်အစားထိုးမှာ ဖြစ်ပါတယ်။ ပေါင် သန်း ၅၀ ဝန်းကျင် ပေးရမယ့် လာဗီယာကို ရခဲ့ပြီရင်း ကွင်းလယ် အားဖြည့်မှု ရပ်တန့်မလား ဆက်ရန်ရှိမလား အားလုံးက စိတ်ဝင်စား စောင့်ကြည့်နေကြပါပြီ။