ကွင်းလယ်လူ ဝါတာရု အန်ဒိုက လီဗာပူးအသင်းမှာ သူ့ အထင်အကြီးဆုံး အသင်းဖော်အကြောင်းကို အသင်းဝဘ်ဆိုဒ်ကနေ ပြောပြလာခဲ့ပါတယ်။
ဝါတာရုက “ လီဗာပူးအသင်းမှာ ကစားသမား အားလုံးက မြင့်မားတဲ့ စွမ်းရည်တွေ ရှိကြပါတယ်။ သူတို့ထဲမှာ ဂိုးသမား အယ်လီဆန်က အတော်လေး ကောင်းတဲ့သူလို့ မြင်ပါတယ်။
ကျနော် ဂိုးသမားတွေ အများကြီးနဲ့ တွဲကစားခဲ့ဖူးပါတယ်။ အယ်လီဆန်ရဲ့ ပြိုင်ဘက်အသင်း ပိတ်ချက်တွေကို တားဆီးနိုင်တဲ့ အရည်အချင်းက သူမတူပါဘူး။
အသင်းမှာရှိတဲ့ တိုက်စစ်သမားတွေကလည်း အတော်လေး မြင့်မားတဲ့ စွမ်းရည်ကောင်းတွေ၊ အရည်အချင်းကောင်းတွေ ရှိကြတာ မှန်ပါတယ်။ ဒါပေမယ့် အယ်လီဆန်ရဲ့ တားဆီးချက်တွေက အံ့မခန်းပါ။
သိပ်ကို အန္တရာယ်ကြီးတဲ့ အခြေအနေတွေကနေ သူက အသင်းအတွက် ကာကွယ်မှုတွေ လုပ်ပေးနိုင်တယ်၊ သူက အတော်လေးကို ပါဝါကောင်းတဲ့ ကစားသမားပါ ” လို့ ပြောပြသွားပါတယ်။
အယ်လီဆန်ဟာ မနှစ်က အသင်း အတော်လေး ဆိုးရွားခဲ့တဲ့ ဘောလုံးရာသီမှာတောင် လက်စွမ်း တည်ငြိမ်ခဲ့သူပါ။ ဒါကြောင့်ပဲ ၂၀၂၂-၂၀၂၃ ဘောလုံးရာသီ လီဗာပူးအသင်း အကောင်းဆုံး ကစားသမားအဖြစ် ပရိသတ်တွေထံက မဲအများဆုံး ရခဲ့ပါတယ်။
ဒီရာသီ လီဗာပူးအသင်း ရလဒ်တွေ တည်ငြိမ်နေခြင်းမှာ ဆာလာရဲ့ တိုက်စစ်ပိုင်း ထူးချွန်မှုအပြင် အယ်လီဆန်ရဲ့ ဂိုးပေါက် ကာကွယ်နိုင်စွမ်းတွေကြောင့်ပဲ ဖြစ်ပါတယ်။