လီဗာပူးအသင်းမှာ ကြယ်ပွင့်တွေဖြစ်တဲ့ ဟာဗေးနဲ့ ကာတစ်ဂျုံးစ်တို့ ရှိနေတာကြောင့် ကလော့ပ်အနေနဲ့ ဒီနွေရာသီမှာ ဈေးကြီးတဲ့ ခေါ်ယူအားဖြည့်မှုတွေလုပ်ဖို့ လိုအပ်ရဲ့လားလို့ ကလပ် ကစားသမားဟောင်းကြီး ဂရေမီ ဆောင်းနက်စ်က အံ့အားသင့်ဖွယ် ထောက်ပြခဲ့ပါတယ်။
ဟာဗေးဟာ ဒီရာသီ လီဗာပူးအတွက် ပြိုင်ပွဲစုံ ၄၂ ပွဲထိ ကစားခွင့်ရခဲ့ပြီး ၅ ဂိုး သွင်းယူထားတယ်။ ဂျုံးကတော့ နောက်ဆုံး ၅ ပွဲဆက် ပွဲထွက်ခွင့် ရထားပါတယ်။ ဒီကွင်းလယ်လူ နှစ်ယောက်ဟာ အန်ဖီးမှာ ပွဲထွက်နေရာတွေ အပိုင်သိမ်းထားဖို့ အခွင့်အရေးရှိတယ်လို့ ဆောင်းနက်စ်က မြင်နေတာပါ။
“ သူတို့ထဲက တချို့ဟာ ကလပ်မှာ အနာဂတ်အတွက် တိုက်ပွဲဝင်နေရတယ်။ လူငယ်ကစားသမားတွေဖြစ်တဲ့ ဟာဗေးအဲလီယော့နဲ့ ကာတစ်ဂျုံးစ်တို့က ဈေးကြီးတဲ့ ကွင်းလယ်လူတွေ ဝယ်စရာ မလိုဘူးဆိုတာ နည်းပြကို ပြသရမယ်။ လိုအပ်တဲ့ ကွင်းလယ်လူ ရှိပြီးသားဆိုတာကိုပေါ့ ” လို့ ဆောင်းနက်စ်က ပြောခဲ့တာပါ။
မနေ့ကပွဲမှာ လီဗာပူးဟာ ပွဲအစ ၁၅ မိနစ်အတွင်း ၃-၀ သွင်းယူနိုင်ခဲ့ပါတယ်။ ဒါပေမယ့် စပါးတို့ ပွဲထဲ ပြန်ဝင်လာအောင် အခွင့်အရေး ပေးခဲ့လို့ နာကျင်အချိန်ပို နောက်ဆုံးမိနစ်လောက်မှ ဂျိုတာက အနိုင်ဂိုး သွင်းယူပေးလိုက်တာ ဖြစ်ပါတယ်။ ဆောင်းနက်စ်ကတော့ အသင်းရဲ့ ခြေစွမ်းကို အထင်မကြီးနေခဲ့ပါဘူး။
“ ဒီနှစ်မှာ လီဗာပူးက အပတ်တိုင်း တိုက်ပွဲဝင်ဖို့ အဆင့်သင့်မဖြစ်နေခဲ့ဘူး။ စိတ်အားထက်သန်မှုအကြောင်း ကျွန်တော်တို့ ပြောကြတယ်။ ဒါက မီးခလုတ်လိုမျိုး ပိတ်လိုက်၊ ဖွင့်လိုက် လုပ်လို့မရဘူး။ အသင်းကြီးတစ်သင်းအတွက် ကစားပေးတဲ့အခါမှာ အမြဲတမ်း စိတ်ဓာတ်က ပြင်းပြနေဖို့လိုတယ်။ ဒီနှစ်မှာ ကစားသမားတွေက အဲ့လို မလုပ်ပြနိုင်ခဲ့ဘူး ” လို့ ဆောင်းနက်စ်က ဆိုခဲ့ပါတယ်။
လီဗာပူးဟာ စပါးကို အနိုင်ရပြီးနောက် အဆင့် ၅ နေရာကို တက်သွားခဲ့ပေမယ့် တစ်ပွဲပိုကစားထားပြီးတော့ အဆင့်လေးနေရာက မန်ချက်စတာယူနိုက်တက်နဲ့ ၇ မှတ် ကွာဟနေတာကြောင့် ချန်ပီယံလိဂ်ဝင်ခွင့်ရဖို့တော့ ရုန်းကန်နေရဆဲဖြစ်ပါတယ်။