အီသီဟက်မှာ မန်စီးတီးနဲ့ ယှဉ်ပြိုင်ရမယ့်ပွဲအတွက် ကွင်းလယ်ဒိုင်လူကြီး နာမည် ထွက်လာခဲ့ပြီဖြစ်ကာ ဂရိတ် မန်ချက်စတာဖွား ဒိုင်ဖြစ်ပြီး လီဗာပူးနဲ့ အကောင်းမြင်စရာ ရလဒ်တွေ ရှိထားသူ ဖြစ်နေပါတယ်။
ကွင်းလယ်ဒိုင်အဖြစ် Chris Kavanagh ကိုင်တွယ်မှာဖြစ်ကာ VAR ဒိုင်အဖြစ် Stuart Attwell တာဝန်ယူဖို့ ရှိနေပါတယ်။ လက်ထောက် VAR ဒိုင်အဖြစ်တော့ Tim Wood က တာဝန်ယူမှာပါ။
ကွင်းထဲမှာ စည်းကြပ်ဒိုင်တွေအဖြစ် Simon Bennett နဲ့ Dan Robathan တို့ဖြစ်ကာ စတုတ္ထဒိုင်အဖြစ်က Thomas Bramall တို့ဖြစ်ပါတယ်။
Kavanagh ဟာ သူ့ရဲ့ ဒိုင်ဘဝမှာ လီဗာပူးအသင်းကို ၁၅ ကြိမ် ကိုင်တွယ်ထားဖူးပါတယ်။ ၂၀၁၈ ကနေ စတင်တဲ့ အဆိုပါ ၁၅ ပွဲမှာ လီဗာပူးက ၁၃ ပွဲ အနိုင်ရခဲ့ကာ ၂ ပွဲပဲ ရှုံးနိမ့်ထားဖူးပါတယ်။ ဒီရာသီမှာ သူကိုင်တွယ်တဲ့ ဖောရက်စ်၊ ဝက်စ်ဟမ်း ပွဲတွေကိုလည်း လီဗာပူးအသင်း အနိုင်ရထားပါတယ်။
ဂရိတ်မန်ချက်စတာဖွား Kavanagh ဟာ မာဆေးဆိုဒ် ဒါဘီပွဲကို ၂ ကြိမ် တာဝန်ယူဖူးပေမယ့်လို့ လီဗာပူးနဲ့ မန်ချက်စတာကလပ်တွေ ယှဉ်ပြိုင်ရတဲ့ ပွဲကြီးတွေကိုတော့ တစ်ကြိမ်မှ တာဝန်ယူဖူးခြင်း မရှိပါဘူး။
လီဗာပူးအသင်းဟာ နောက်ဆုံး ၁၅ နှစ်အတွင်း အီသီဟက်မှာ သွားကစားတဲ့ ပရီးမီးယားလိဂ်ပွဲတွေမှာ အဝေးကွင်း ၁ ပွဲပဲ အနိုင်ရထားပါတယ်။ ဒီတစ်ကြိမ် ထပ်မံ အနိုင်ဖို့ မျှော်လင့်နေမှာဖြစ်သလို သမာတမတ်ကျတဲ့ ဒိုင်ရခြင်းက အထောက်အကူ ဖြစ်စေပါလိမ့်မယ်။