ပရီးမီးယားလိဂ် ပွဲစဉ် ၁၅ ကစားထားအပြီးမှာ လီဗာပူးအသင်းဟာ အမှတ်ပေးဇယား ဒုတိယနေရာမှာ ရှိနေဆဲဖြစ်ပြီး ထိပ်ဆုံးနေရာက အာဆင်နယ်နဲ့ ၂ မှတ်ကွာဟနေပါတယ်။
ဒီဇင်ဘာနဲ့ နှစ်သစ်ကူးအစမှာတော့ အသင်းဟာ ခက်ခဲတဲ့ ပြိုင်ဘက်တွေကို ရင်ဆိုင်ရမယ့် ပွဲစဉ်တွေ ရှိနေတယ်။ ဒီပွဲတွေကို အင်ပြည့်အားပြည့် ယှဉ်ပြိုင်နိုင်မှာတော့ မဟုတ်ဘဲ စီနီယာအချို့ ဒဏ်ရာကြောင့် အနားယူနေရတာမို့ လူစာရင်း ထိခိုက်မှု အနည်းငယ် ရှိနေမှာ ဖြစ်ပါတယ်။
အယ်လီဆန်နဲ့ ဂျိုတာတို့ လေ့ကျင့်ရေး မဝင်သေးသလို မာတစ်ကတော့ ရာသီကုန်ထိ နားရပြီ ဖြစ်ပါတယ်။ မာကာကလည်း ရှက်ဖီးကို အနိုင်ရတဲ့ပွဲမှာ အသေးစား ဒူးဒဏ်ရာ ရသွားခဲ့တာ ဖြစ်ပါတယ်။ ရော်ဘတ်ဆန်၊ သီယေဂို၊ ဘာ့ဆီတစ်တို့ကတော့ ၂၀၂၄ မှ ကစားနိုင်မှာပါ။
အသင်းရဲ့ လာမယ့် ပရီးမီးယားလိဂ် ပွဲစဉ် ၅ ပွဲဟာ ပဲလေစ့် (အဝေးကွင်း)၊ မန်ယူနိုက်တက် (အိမ်ကွင်း)၊ အာဆင်နယ် (အိမ်ကွင်း)၊ ဘန်လေ (အဝေးကွင်း)၊ နယူးကာဆယ် (အိမ်ကွင်း) ပွဲစဉ်တွေ ဖြစ်ပါတယ်။
အသင်းကစားရမယ့် အိမ်ကွင်းပွဲ ၃ ပွဲမှာ အန်ဖီးကွင်းဟာ အနည်းဆုံး ပရိသတ် ၅၅၅၀၀ ကို ဧည့်ခံနိုင်မှာမို့ ဒီရာသီ ပရိသတ်အများဆုံး ဝင်ရောက်နိုင်မယ့် ပမာဏ ဖြစ်ပါတယ်။ သမိုင်းကြောင်းအရနဲ့ ဒီရာသီ ပရီးမီးယားလိဂ် ရပ်တည်ချက်တွေအရ အိမ်ကွင်းပွဲ ၃ ပွဲလုံးဟာ ၉ မှတ် အပြည့် ယူနိုင်ဖို့ အရေးပါလာပါလိမ့်မယ်။
ယူနိုက်တက်ဟာ ဖိအားတွေ အများကြီး ရင်ဆိုင်နေရပေမယ့် ရလဒ်ပိုင်းမှာတော့ ခပ်ညံ့ညံ့ မဟုတ်တာကို သတိပြုဖို့ လိုပါတယ်။ အသင်းနဲ့ သူတို့ကြားမှာ ရမှတ်က ၇ မှတ်ပဲ ကွာဟနေသေးတာပါ။
ဇယားထိပ်က အာဆင်နယ်ကို ကျော်တက်လိုရင် အိမ်ကွင်းပွဲမှာ သေချာပေါက် အနိုင်ယူဖို့ လိုသလို နယူးကာဆယ်ဟာ ဒီရာသီ ကြီး ၆ ကြီး အသင်းတွေထဲက ရမှတ်တွေ ခွဲယူနိုင်စွမ်း မြင့်မားတာကိုလည်း သတိပြုမိဖို့ လိုပါတယ်။
ပဲလေစ့်နဲ့ ဘန်လေတို့က ရလဒ်တွေ ဆိုးရွားနေပြီး နည်းပြရွိုင်ဟောင်ဆန်ကော၊ နည်းပြကွန်ပနီပါ ရာထူးက ထုတ်ပယ်ခံရဖို့ ရေပန်းစားနေပေမယ့် ဒီလို ပြိုင်ဘက်တွေဟာ ဆုံးရှုံးဖို့ မရှိတော့တဲ့နောက် ကျားကုတ်ကျားခဲ ကစားတတ်ကြတဲ့ အသင်းတွေဖြစ်ပါတယ်။
ဒီ ၅ ပွဲမှာ လီဗာပူးအသင်း ရမှတ် ၁၅ မှတ်ရခဲ့ရင် ပွဲကြပ်ကာလ တစ်ခုကို ကျော်ဖြတ်ရင်း ပရီးမီးယားလိဂ်ဖလား ဗိုလ်စွဲဖို့ရာ ရေပန်းစား အသင်းတစ်သင်းအဖြစ် မှတ်ကျောက်တင်ခံနိုင်မှာပဲ ဖြစ်ပါတယ်။