ဒီကနေ့ည ယူရိုပါလိဂ် ၁၆ သင်း ရှုံးထွက် မဲခွဲမှုအတွက် သိကောင်းစရာများ

ယူအီးအက်ဖ်အေရဲ့ ယူရိုပါလိဂ်ပြိုင်ပွဲဟာ အုပ်စုအဆင့် ပွဲစဉ်တွေ ပြီးဆုံးထားပြီဖြစ်သလို play-off ပွဲစဉ်တွေ ကစားခဲ့ပြီဖြစ်ကာ အနိုင်ရ ကလပ် ၈ သင်းလည်း ပေါ်ထွက်လာပါပြီ။ နောက်အဆင့်အတွက် မဲခွဲမှုတွေ ဒီကနေ့ညမှာ စတင်လာတော့မှာပါ။

ယူရိုပါလိဂ် ၁၆ သင်း ရှုံးထွက် စတင်မယ့် အချိန်?

ဒီကနေ့ည မြန်မာစံတော်ချိန် ၅ နာရီခွဲမှာတော့ ယူရိုပါလိဂ် ၁၆ သင်းအဆင့် မဲခွဲမှု ရှိပါမယ်။ မဲခွဲမှုကို ယူအီးအက်ဖ်အေ ရုံးချုပ်ရှိရာ ဆွစ်ဇလန်နိုင်ငံ Nyon မြို့မှာ ပြုလုပ်မှာပါ။

ဘယ်အသင်းတွေ ထိပ်တိုက်တွေ့မှာလဲ

အုပ်စုအဆင့်မှာ အုပ်စုဗိုလ်နေရာ ရခဲ့တဲ့ ကလပ် ၈ သင်းဟာ play-off က တက်လာမယ့် ကလပ် ၈သင်းနဲ့ မဲနိုက် ယှဉ်ပြိုင်ရမှာဖြစ်ပါတယ်။ အုပ်စုဗိုလ်ရခဲ့တဲ့ အသင်းတွေက ဦးစားပေးအသင်းတွေဖြစ်ပါတယ်။

ဦးစားပေးအသင်း (၈) သင်း

  • အတ္တလန်တာ
  • ဘရိုက်တန်
  • လေဗာကူဆင်
  • လီဗာပူး
  • ရိန်းဂျား
  • ဆလားဗီးယား ပရာဟာ
  • ဗီလာရီးရဲလ်
  • ဝက်စ်ဟမ်း

အခြား (၈) သင်း

  • အေစီမီလန်
  • ဘင်ဖီကာ
  • ဖရန့်ဘတ်
  • မာဆေး
  • ကွာရာဘက်
  • ရိုးမား
  • စပါတာ ပရာဟာ
  • စပို့တင်း

၁၆ သင်း ရှုံးထွက်မှာ နိုင်ငံတူတွေ အတွဲကျခွင့်ရှိလား?

ဒီအဆင့်မှာ နိုင်ငံတူအသင်းတွေ အတွဲကျမှာ မဟုတ်ပါဘူး။

ရှုံးထွက်ကို ၂ ကျော့ကစားမှာလား?

ရှုံးထွက်ကို ၂ ကျော့ကစားမှာဖြစ်ကာ ဦးစားပေးအသင်းတွေဟာ ဒုတိယအကျော့ကို အိမ်ကွင်းမှာ ယှဉ်ပြိုင်ကစားရပါမယ်။ အိမ်ကွင်း၊ အဝေးကွင်း ဂိုးရလဒ် တူညီနေမယ်ဆိုရင် မိနစ် ၁၈၀ နောက်ပိုင်း အချိန်ပို မိနစ် ၃၀ ကစားရမှာပါ။ ဆက်လက်ပြီး ရလဒ် တူညီနေရင် ပင်နယ်တီ အဆုံးအဖြတ် ကန်ရပါမယ်။

ယူရိုပါလိဂ် ၁၆ သင်း ရှုံးထွက် ကန်မယ့် အချိန်

ပထမအကျော့ကို မတ်လ ၇ ရက်နေ့မှာ ယှဉ်ပြိုင်စေပြီး ဒုတိယအကျော့ကတော့ မတ်လ ၁၄ ရက်ဖြစ်ပါတယ်။

နောက်ပိုင်းမှာ ကွာတားဖိုင်နယ်၊ ဆီမီးဖိုင်နယ် ပွဲစဉ်တွေကို ဆက်လက် မဲခွဲပါမယ်။ ဖိုင်နယ်ကိုတော့ မေလ ၂၂ ရက်နေ့ အိုင်ယာလန်ရဲ့ Dublin Arena ကွင်းမှာ ယှဉ်ပြိုင်စေမှာဖြစ်ပါတယ်။