လီဗာပူးအသင်း ကာရာဘောင်းဖလား အောင်မြင်ရေးမှာ အဓိကကျခဲ့တဲ့ ဂိုးသမား ကလယ်ဟာကတော့ ကစားသမားတိုင်းရဲ့ အိပ်မက်လို အခိုက်အတန့်ကို ပိုင်ဆိုင်နေရပါတယ်လို့ ဖွင့်ဟသွားပါတယ်။
ကလယ်ဟာကတော့ ” ဒီလို ဆုဖလား အောင်မြင်မှု အခိုက်အတန့်ဆိုတာ ကစားသမားတိုင်းရဲ့ အိပ်မက်ပါ။ ပင်နယ်တီ မကန်ဘဲ အနိုင်ရခဲ့တာက ပိုကောင်းပါတယ်။ ကျနော်အတွက် သိပ်ကို ကောင်းမွန်တဲ့ အခိုက်အတန့်ပါပဲ။ အရမ်းပဲ ကျေနပ်ရပါတယ်။
နောက်ထပ် ပြိုင်ပွဲတွေအတွက် ကျနော်တို့ အာရုံစိုက်ထားရဦးမှာပါ။ အခုကတော့ သိပ်ကောင်းတဲ့ အခိုက်အတန့်ပါပဲ။ ကျနော်တို့ အနေအထားကောင်းမှာ ဆက်ရှိနေဆဲ ဖြစ်ပါတယ် ” လို့ ဖွင့်ဟခဲ့ပါတယ်။
ဒီရာသီ ကာရာဘောင်း ပြိုင်ပွဲမှာ ဆက်တိုက် လက်စွမ်းပြခဲ့သလို အယ်လီဆန် မရှိချိန် လီဗာပူးဂိုးပေါက်ကို တာဝန်ယူမယ့် ကလယ်ဟာဟာ ကမ္ဘာ့အဆင့် ဂိုးသမားတစ်ယောက်ပါလို့ ဗန်ဒိုက်က ချီးကျူးပါသေးတယ်။
လီဗာပူးအသင်းခေါင်းဆောင် ဗန်ဒိုက်ကတော့ ” ကလယ်ဟာက မယုံနိုင်စရာပါပဲ။ အသင်း လိုအပ်လာတိုင်း အမြဲတမ်း ကြံ့ခိုင်နေတယ်၊ နောက်ထပ် ဆုဖလားတွေ အနိုင်ရဖို့ သူက တွန်အားပေးနိုင်ခဲ့ပါတယ်။
သူက ကမ္ဘာ့အဆင့် ဂိုးသမားပါ။ ဒီနေ့မှာ အသင်းအတွက် သူရှေ့ထွက်လာခဲ့ပါတယ်။ သူက ဂိုးသမားကောင်းပါ။ လီဗာပူးလိုအသင်းမျိုး လိုအပ်တဲ့ ဂိုးသမားပါပဲ ” လို့ ချီးကျူးသွားတာ ဖြစ်ပါတယ်။