ဒီအပတ် ဘရိုက်တန်ကို အနိုင်ရတဲ့ပွဲအပြီးမှာ ပွဲစဉ်ရဲ့ အကောင်းဆုံး ကစားသမားဖြစ်ခဲ့တဲ့ မာကာကတော့ အသင်းဖော်ဖြစ်တဲ့ ခံစစ်သမား ကွမ်းဆက်နဲ့ ပတ်သက်လို့ သူ့အမြင်ကို ထုတ်ဖော်ခဲ့ပါတယ်။
လူငယ်ခံစစ်သမားဟာ ဒီရာသီ စီနီယာကြီးတွေ ဒဏ်ရာရမှုကို အခွင့်အရေးအဖြစ် အသုံးချကာ ပထမအသင်းမှာ နေရာရလာသူဖြစ်ပါတယ်။ သူ့ရဲ့ တည်ငြိမ်မှု၊ ကိုင်တွယ်နိုင်စွမ်းတွေကြောင့် မျှော်လင့်ထားတာထက် ပွဲကစားခွင့်တွေ ပိုရလာနေပါတယ်။
“ ကွမ်းဆက်က သိပ်ကောင်းတဲ့ ကစားသမားပါ။ ဗန်ဒိုက်နဲ့တွဲပြီး အသင်းအတွက် သူလုပ်ပေးနေတာတွေက သိပ်ကို အရေးကြီးပါတယ်။ ဘာလို့လဲဆိုတော့ ဘောလုံးကစားဖို့ လိုအပ်နေတဲ့ ကျနော်တို့အတွက် တည်ငြိမ်မှုတွေ ပေးလို့ပါပဲ။
ဘောလုံးကိုင်ကစားခွင့်ရချိန်မှာတောင် သူက သိပ်ထူးချွန်တယ်လို့ ကျနော် မြင်တယ်။ သူ့ထံက ဒီလို ခြေစွမ်းမျိုးတွေ မြင်ရတာ ကျနော် ပျော်ပါတယ် ” လို့ မာကာက မှတ်ချက်ပေးခဲ့တာ ဖြစ်ပါတယ်။
ဒီရာသီမှာ ကွမ်းဆက်ဟာ လီဗာပူးအတွက် ပြိုင်ပွဲစုံ ၂၇ ပွဲ ကစားပေးထားပါတယ်။ သူဟာ အသင်းနဲ့အနာဂတ်ရှည် ရှိပြီး နည်းပြသစ်လက်ထက်မှာ ဆက်လက် နေရာပေးခံရဖွယ်ရှိတာဖြစ်ပါတယ်။