ဘရိုက်တန် ကွင်းလယ်လူ အယ်လစ္စတာကို ပရီးမီးယားလိဂ်ကလပ် ၃ သင်းက ချိတ်ဆက်နေကြောင်းကို ဒီမနက်ကပဲ တောင်အမေရိက သတင်းထောက်က စတင်ဖော်ပြလာပါတယ်။
ဒီကာလတွေအတွင်း လီဗာပူးရဲ့ အပြောင်းအရွှေ့ သတင်းတွေဟာ သက်ဆိုင်ရာ တောင်အမေရိက သတင်းထောက်တွေကနေ အမြဲစတင်လာတတ်တာကို သတိပြုစရာ ဖြစ်ပါတယ်။ အခု အယ်လစ္စတာ သတင်းကိုလည်း လူသိများတဲ့ အာဂျင်တီးနား သတင်းထောက် CLMerlo က ဖော်ပြလာတာပါ။
လီဗာပူး၊ ယူနိုက်တက်နဲ့ အာဆင်နယ်တို့ဟာ ဒီနွေစျေးကွက်မှာ မက် အယ်လစ္စတာကို ခေါ်ယူဖို့ အထူး စိတ်ဝင်စားပါတယ်။ ကလပ်တွေထဲက ၂ သင်းဟာ ဘရိုက်တန် ကစားသမားအတွက် ညိနှိုင်းမှုတောင် စနေပါပြီ။
ကစားသမားရဲ့ ဖခင်နဲ့ အေးဂျင့်တို့ အခြေအနေ စနည်းနာဖို့ အင်္ဂလန်ကို ရောက်နေပါတယ်။
@CLMerlo #LFCTHADIN— Liverpool FC News Myanmar (@LiverpoolThaDin) April 6, 2023
အသက် ၂၄ နှစ်အရွယ် အယ်လစ္စတာဟာ တောင်အမေရိက ကနေ ဥရောပမြေပေါ် စနင်းကတည်းက အင်္ဂလန်လိဂ်မှာ ဘရိုက်တန်တစ်သင်းတည်းမှာ ကစားလာခဲ့တာပါ။ အစပိုင်းမှာ ကွင်းလယ်တိုက်စစ်နဲ့ နေရာစုံမှာ ကစားခဲ့ပေမယ့် ဒီရာသီမှာတော့ ကွင်းလယ် ခံစစ်နေရာကို ပိုမို အားပြုလာနေပါတယ်။
လက်ရှိ ဘရိုက်တန်မှာ လုပ်ခ ပေါင် ၅၀၀၀၀ ဝန်းကျင်ရနေတဲ့ သူ့ကို ပြောင်းရွှေ့ကြေး ပေါင် သန်း ၅၀-၆၀ လောက်နဲ့ ခေါ်ယူနိုင်မယ် ခန့်မှန်းထားရတယ်။
အယ်လစ္စတာဟာ စပိန်နဲ့ အင်္ဂလိပ်စကားကို ပြောဆိုနိုင်တာမို့ လက်ရှိ လီဗာပူး အဝတ်လဲခန်းလို တောင်အမေရိက ကစားသမား များပြားနေတဲ့ လူစာရင်းအတွက် အဆင်ပြေဖွယ် ရှိပါတယ်။