လီဗာပူးအသင်းဟာ ၂၀၁၆ ခုနှစ်နောက်ပိုင်း ပထမဆုံးအကြိမ် အဖြစ် ယူရိုပါလိဂ် အဆင့်ထံ ဆင်းကစားနေရပြီး ဒီကနေ့မှာ အုပ်စုတွင်း ပထမဆုံးပွဲကို စတင် ယှဉ်ပြိုင်မှာ ဖြစ်ပါတယ်။
လီဗာပူးအသင်းဟာ ဒီပွဲကို အနိုင်ရဖို့ကော ယူရိုပါလိဂ် ချန်ပီယံဖြစ်ဖို့ပါ ရေပန်းစားပါတယ်။ ဒါပေမယ့်လို့ ဩစတြီးယားကလပ် လက်စ်အသင်းဟာ အိမ်ကွင်း ပရိသတ်တွေရှေ့မှာ လီဗာပူးကို ယှဉ်ပြိုင်ကစားလိုစိတ် ပြင်းထန်နေပါတယ်။
“ ဒီပွဲဟာ အသင်းက ကစားသမားတိုင်းအတွက်၊ ပရိသတ်တိုင်းအတွက် နှစ်တစ်နှစ်ရဲ့ အကောင်းဆုံးပွဲပါ။ ဒီပွဲအတွက် ကျနော်တို့ အစွမ်းကုန် ပေးဆပ်ပြီး ဘာဖြစ်လာမလဲ မျှော်လင့်နေပါပြီ ” လို့ လက်စ်အသင်းရဲ့ အသင်းခေါင်းဆောင်က Sky Sport Austria ကနေ ပြောပါတယ်။
ယာဂင်ကလော့ပ်ဟာ လီဗာပူးကို ကိုင်တွယ်လာတဲ့ ၈ နှစ်အတွင်း အသင်းကို ဥရောပ ပြိုင်ပွဲတွေအတွင်း ဖိုင်နယ် ၄ ကြိမ်ထိ ပို့ပေးခဲ့သူပါ။ ယာဂင်ကလော့ပ်ရဲ့ လီဗာပူးအသင်းဟာ ဥရောပမှာတော့ အတော်လေးကို ဂုဏ်သတင်းကြီးမားထားတာ ဖြစ်ပါတယ်။
လက်စ်အသင်းနည်းပြက “ လီဗာပူးကို လူတိုင်း သိပါတယ်၊ သူတို့က ထိပ်တန်းအသင်းဆိုတာ လူတိုင်း သိထားကြတယ်။ ဒါပေမယ့် ကျနော်တို့ မကြောက်ပါဘူး။ သူတို့ကို စစ်စစ်မှန်မှန် စိန်ခေါ်နိုင်ဖို့ ကျနော်တို့ အစွမ်းကုန် အားထုတ်မှာ ဖြစ်ပါတယ် ” လို့ ထုတ်ပြောလာခဲ့ပါတယ်။
လက်စ်အသင်းဟာ ပရိသတ်အားပေးမှု ကောင်းမွန်သလို လက်တလောမှာ ရလဒ်တွေ ကောင်းနေတဲ့အသင်း ဖြစ်ပါတယ်။ ဒီလို ပြိုင်ဘက်ကို ရင်ဆိုင်ခြင်းဟာ ရာသီစမှာ တာထွက်ကောင်းနေတဲ့ လီဗာပူးရဲ့ ခြေစွမ်းကို ပိုမို တောက်ပလာဖို့ အခွင့်အရေး ဖြစ်လာဖို့ ရှိနေပါတယ်။