လီဗာပူး ကစားသမားဘဝ ပထမဆုံး ပွဲထွက်မှုအဖြစ် လက်စ်အသင်းနဲ့ ယှဉ်ပြိုင်တဲ့ ယူရိုပါလိဂ်ပွဲမှာ ကွင်းလယ်လူသစ် ဂရာဗင်ဘက်ချ် ပါဝင်သွားခဲ့ပါတယ်။
တိုက်စစ်သမား ဒီယက်ဇ်အတွက် ဂိုးထောက်ပံ့မှု လုပ်ပေးနိုင်ခဲ့တဲ့ ဂရာဗင်ဘက်ချ်ဟာ ဒဏ်ရာကြောင့် ပွဲပြီးတဲ့ထိတော့ မကစားနိုင်ခဲ့ပါဘူး။ သူဟာ ကောင်းမွန်တဲ့ ဘောလုံး သယ်ယူမှုတွေ လုပ်ပြခဲ့ပြီး ပရိသတ်တွေ ကျေနပ်အောင်ထိ စွမ်းဆောင်ပြနိုင်ခဲ့ပါတယ်။
ပွဲအပြီး လီဗာပူးဝဘ်ဆိုဒ်ကနေ ဂရာဗင်ဘက်ချ်က “ ကျနော်တို့ အစ မကောင်းခဲ့ပါဘူး။ ဒါပေမယ့် စိတ်ဓါတ်ပိုင်းလေး ရှိခဲ့ပြီး အခြေအနေကို ပြောင်းလဲခဲ့နိုင်တယ်။ ဒီပွဲအတွက် ပျော်မိပါတယ်။
ကိုယ့်ဘာသာ အတွက်ဆိုရင်တော့ ကျနော် နည်းနည်းချာခဲ့တဲ့ အခိုက်အတန့်တွေ ရှိခဲ့ပါတယ်။ ဒီတော့ အဲ့အတွက် အလုပ်လုပ်ရမှာတွေ ရှိပါတယ်။ ကျန်တာကတော့ အဆင်ပြေပါတယ် ” ဆိုပြီး ထုတ်ပြောခဲ့ပါတယ်။
လီဗာပူးအသင်းဟာ စျေးကွက်မှာ ကွင်းလယ် စွယ်စုံ ကစားနိုင်တဲ့ ကစားသမားကို ရှာဖွေနေခဲ့ပြီး ဂရာဗင်ဘက်ချ်ကို ခေါ်ယူခဲ့တာပါ။ ကလော့ပ်က ဘယ်လို ပုံစံ ကစားဖို့ ညွှန်ကြားထားသလဲ မေးခံရချိန်မှာ ဂရာဗင်ဘက်ချ်ကတော့ လွတ်လွတ်လပ်လပ် ကစားဖို့ပဲ မှာထားတယ်လို့ ဆိုပါတယ်။
ကျောနံပါတ် ၃၈ သမားက “ ပြိုင်ဘက်က ကျစ်လစ်ခဲ့ပေမယ့် ကျနော်တို့ အသင်းက ပိုကောင်းခဲ့ပါတယ်။ ကျနော်တို့ နံပါတ် ၆ နှစ်ဦးနဲ့ ကစားခဲ့ပြီး ကျနော်ကတော့ တိုက်စစ်ကို လိုက်ပါခွင့်ရခဲ့ပါတယ်။ ကျနော်တို့ ကောင်းကောင်းကစားခဲ့တယ် ထင်ပါတယ်။
မနေ့က လေ့ကျင့်ရေး အပြီးမှာ နည်းပြက ကျနော် အနား လာပြီး လွတ်လွတ်လပ်လပ် ကစားဖို့ မှာခဲ့ပါတယ်။ ကိုယ်လုပ်ချင်တဲ့အတိုင်း လုပ်ကြည့်ဖို့ပေါ့။ ကျနော် ဘယ်လို ကစားရမယ်ဆိုတာတွေ ရှိပေမယ့် နည်းပြကတော့ ကိုယ့်ပုံစံအတိုင်း ကစားဖို့ပဲ မှာခဲ့ပါတယ် ” လို့ ရှင်းပြခဲ့ပါတယ်။